Á dögunum var haldið mentoranámskeið í Sykursal Grósku þar sem 55 nýir mentorar hlutu þjálfun. KLAK stóð fyrir þessum viðburði. Nýsköpunarsjóður er einn eiganda KLAK og fögnum við þeim mikla áhuga reyndra stjórnenda á því að gerast mentorar.
Á námskeiðinu fengu mentorarnir meðal annars fræðslu um listina að leiðbeina sprotum og fylgdust með mentorafundum í rauntíma. Alls starfa 180 stjórnendur og sérfræðingar víðast hvar úr íslensku atvinnulífi nú sem mentorar hjá KLAK VMS, mentoraþjónustu KLAK - Icelandic Startups. Fulltrúi MIT VMS frá Bandaríkjunum, Jonathan Green, framkvæmdastjóri Arcadia Funds, kom til landsins til að kenna nýjum mentorum handtökin.
KLAK VMS var stofnað árið 2022 og hefur það að markmiði að styðja við sprotafyrirtæki í viðskiptahröðlum í umsjón KLAK.
„Það er stórkostlegt að sjá hve margir stjórnendur og sérfræðingar úr íslensku atvinnulífi eru tilbúnir að gefa vinnu sína til að styðja við sprotafyrirtæki og árangurinn af starfi KLAK VMS síðustu tvö ár hefur verið ævintýralegur. Það er ljóst að mentoraþjónusta KLAK VMS er í dag með eitt öflugasta teymi mentora á landinu,“
sagði Magnús Ingi Óskarsson, forstöðumaður KLAK VMS.
Nánar má fræðast um viðburðinn hér.
