Ásta Dís Óladóttir hefur tekið við stjórnarformennsku hjá Nýsköpunarsjóði atvinnulífsins. Hún tekur við af Sigurði Hannessyni sem hefur gegnt formennsku síðan árið 2018.
Ásta Dís Óladóttir er dósent í stjórnun og alþjóðaviðskiptum við Háskóla Íslands. Hún lauk doktorsgráðu frá Copenhagen Business School árið 2010 og hefur á undanförnum árum stýrt hinum ýmsu fyrirtækjum og stofnunum, auk þess að sinna kennslu við háskóla bæði hér á landi og erlendis. Hún hefur setið í fjölmörgum stjórnum, ráðum og nefndum í gegnum árin. Ásta Dís er formaður Viðskiptafræðistofnunar Háskóla Íslands,Vísindasjóðs Háskólans á Akureyri og Jafnvægisvogarinnar. Hún situr í stjórn Samherja og tengdra félaga og í eftirlitsnefnd með framkvæmd lána með ríkisábyrgð vegna Covid 19.
,,Nýsköpunarsjóður atvinnulífsins er fjárfestingarsjóður sem á sér sögu sem spannar aldarfjórðung. Á þeim tíma hefur hann tekið þátt í þróun og vexti atvinnulífsins, með því að fjárfesta í nýsköpunar- og sprotafyrirtækjum. Ég er því full tilhlökkunar að starfa með sjóðnum að nýju en ég hef sinnt ýmsum stjórnarsetum fyrir hönd sjóðsins í gegnum árin, auk þess að vinna náið með stjórnendum hans í gegnum stjórnarsetu mína í Frumtaki og fjárfestingaráði þess á sínum tíma. Sjóðurinn hefur nýverið farið í gegnum stefnumörkun og fengið nýja ásýnd, auk þess sem hann er að fjárfesta í allra minnstu sprotunum á markaðnum. Hann á því ekki í samkeppni við aðra sjóði um fjárfestingu heldur brúar bilið þar til aðrir sjóðir eru líklegir til að fjárfesta. Það er alveg ljóst í dag að það er mikil þörf fyrir slíkar fjárfestingar á markaðnum og spennandi tímar framundan, því það má með sanni segja að nýsköpun sé undanfari allra þeirra tæknibreytinga sem við höfum séð og upplifað á síðustu árum og áratugum og við erum bara rétt að byrja,“ segir Ásta Dís.
Aðrir stjórnarmenn eru Sigríður Mogensen sem er nú varaformaðurstjórnar, Ragnhildur Jónsdóttir, Róbert Farestveit og Valdimar Halldórsson.
